Maradi: Mata na ƙara shiga harkar kafa makarantu masu zaman kansu.

Maradi: Mata na ƙara shiga harkar kafa makarantu masu zaman kansu.

A birnin Maradi, mata na ƙara taka rawa a harkar kafa da gudanar da makarantu masu zaman kansu, fannin da a baya aka fi ganin maza ne suka fi rinjaye. Ta hanyar wannan yunƙuri, suna ba da gudummawa wajen bunƙasa ilimi da tarbiyyar yara, tare da fuskantar ƙalubalen gudanar da wannan aiki.

 

Tsawon lokaci, harkar kafa makarantu masu zaman kansu ta kasance fannin da maza suka fi rinjaye. Sai dai a ‘yan shekarun nan, mata da dama a birnin Maradi sun fara shiga wannan fanni, inda suke zuba jari wajen kafa makarantu domin taimakawa wajen inganta harkar ilimi.

Hajiya Kadija Abdoul Rahmane, wadda ta kafa makarantar Ibadurrahmane, na daga cikin matan da suka shiga wannan fanni. Ta bayyana cewa manufarta ta kafa makarantar ita ce haɗa ilimin addinin Musulunci da na zamani domin bai wa yara ingantacciyar tarbiyya.

A cewarta, makarantar Ibadurrahmane ta shafe shekaru 24 tana aiki, tana kuma ƙoƙarin bai wa ɗalibai ilimi da tarbiyya. Ta ƙara da cewa makarantar tana da wani shiri na musamman na bai wa marayu da yara marasa galihu damar samun ilimi kyauta.

A nata ɓangaren, Madame Rukki Abdoul Karim, wadda ta kafa makarantar Karan Rahama, ta ce shiga harkar kafa makaranta ya samo asali ne daga burinta na bayar da gudummawa wajen inganta ilimi da tarbiyyar yara.

Ta bayyana cewa makarantar tana haɗa koyar da ilimin boko da na addinin Musulunci, inda take karɓar yara daga shekara biyu zuwa goma sha ɗaya, a matakin renon yara ƙanana da firamare.

Mata na fuskantar ƙalubale wajen gudanar da makarantu

Duk da irin wannan yunƙuri, matan da suka shiga harkar kafa makarantu masu zaman kansu ba sa rasa ƙalubalen gudanar da su. Sai dai suna ci gaba da jajircewa wajen ganin sun cimma manufofin da suka sa gaba, musamman ta fuskar inganta ilimi da tarbiyyar yara.

Wannan ƙoƙari na mata ya samu yabo daga Abdourahamane Himma, wani mahaifi da ɗansa ke karatu a ɗaya daga cikin makarantun da mata suka kafa.

Ya bayyana cewa mata na da haƙuri da dabarun kula da yara, lamarin da ya sa yake ganin gudummawarsu a wannan fanni na da muhimmanci. Ya kuma bayyana gamsuwarsa da yadda ake kula da ɗalibai a irin waɗannan makarantu, musamman wajen koyon karatu, rubutu da iya magana da harshen Faransanci tun daga ƙananan azuzuwa.

Gudummawar mata wajen gina makomar ilimi

Shiga harkar kafa makarantu masu zaman kansu da mata ke yi a birnin Maradi na nuna irin rawar da suke takawa wajen bunƙasa ilimi da tarbiyyar al’umma.

Ta hanyar zuba jarinsu, ƙwarewarsu da jajircewarsu, matan na ƙoƙarin tabbatar da cewa ilimantarwa da tarbiyyar al’umma ba nauyin maza kaɗai ba ne, domin mata ma suna da muhimmiyar gudummawar da za su bayar wajen gina makomar al’umma.

Roumanatou Harou

CATEGORIES

COMMENTS

Wordpress (0)
Disqus ( )