Shanyewar barin jiki : sanin hadarurruka da hanyoyin kare kai.

Shanyewar barin jiki : sanin hadarurruka da hanyoyin kare kai.

Shanyewar ɓangaren ƙwaƙwalwa, wato AVC, wata matsala ce ta lafiya mai tsanani da ke buƙatar kulawar gaggawa. Wannan cuta ba ta shafi tsofaffi kaɗai ba, har ma da matasa. Hawan jini, ciwon sukari, shan taba da wasu cututtuka na iya ƙara haɗarin kamuwa da ita. Bayani kan abubuwan da ke haddasa AVC, alamomin gargaɗi da hanyoyin kariya.

AVC na faruwa ne idan jini ya daina isa ga wani ɓangare na ƙwaƙwalwa ko kuma wani jijiyar jini a cikin ƙwaƙwalwa ya tsage. Saboda haka, yana da muhimmanci a san alamominta domin ɗaukar matakin gaggawa.

Abubuwan da ke ƙara haɗarin kamuwa da AVC :

A cewar Dr Fataou Chaibou, likita a babar assibitin kwararu ta Maradi, matasa ma na iya kamuwa da wannan cuta, musamman idan suna da wasu abubuwan da ke ƙara haɗarin ta.

« AVC ba cuta ce da ta shafi tsofaffi kaɗai ba. Matasa ma na iya kamuwa da ita. Hawan jini, ciwon sukari, shan taba, shan barasa da wasu cututtuka na iya ƙara haɗarin kamuwa da AVC. Saboda haka, yana da muhimmanci a san waɗannan abubuwa tare da duba lafiyar mutum akai-akai », in ji likitan.

Wasu alamomi na iya nuna cewa mutum yana fama da AVC. Daga cikinsu akwai karkacewar fuska kwatsam, raunin hannu ko ƙafa, wahalar magana ko kuma rashin gani kwatsam.

« Idan aka ga waɗannan alamomi, ya kamata a gaggauta kai mara lafiya asibiti. Kada a jira alamomin su ɓace da kansu, kuma kada a yi maganin kai-da-kai. Kowace minti tana da muhimmanci wajen kula da mai fama da AVC », in ji shi.

Rigakafi da gaggauta neman magani :

Domin rage haɗarin kamuwa da AVC, likitan ya ba da shawarar bin kyawawan halaye na rayuwa da kuma kula da lafiyar jiki.

« Rigakafin AVC ya haɗa da duba hawan jini akai-akai, kula da masu ciwon sukari, cin abinci mai kyau, motsa jiki a kai a kai da kuma guje wa shan taba. Haka kuma, matasa su guji halayen da za su iya jefa lafiyarsu cikin haɗari », in ji Dr Fataou Chaibou.

Don haka, AVC cuta ce da bai kamata a raina ba, ko da a tsakanin matasa. Bisa ƙididdigar duniya ta shekarar 2021, kusan kashi 15 cikin 100 na sabbin masu kamuwa da AVC sun kasance mutane masu shekaru tsakanin 15 zuwa 49. Sanin abubuwan haɗari, ɗaukar matakan kariya da kuma gaggauta kai mara lafiya asibiti na taimakawa wajen rage illolin wannan cuta.

CATEGORIES

COMMENTS

Wordpress (0)
Disqus ( )