
NOVEMBER BLUE: Sanin lafiyar Ƙwayar prostate domin kare lafiyar maza.
A yayin watan Nuwamba, wanda aka ware domin wayar da kan jama’a kan cututtukan da suka shafi lafiyar maza, musamman cutar kansar prostate, shirin kixon lafiyar jima’i na Moustapha Mainassara ya mayar da hankali kan muhimmancin wannan ƙwaya, alamomin da ya kamata a kula da su, da kuma muhimmancin zuwa asibiti da wuri.
Prostate: Ƙwaya mai muhimmanci ga lafiyar maza.
Prostate wata ƙwaya ce da take ƙarƙashin mafitsara, kuma tana kewaye da wani ɓangare na bututun da fitsari ke bi. Tana taka muhimmiyar rawa wajen samar da wani ruwa da yake cikin maniyyi, wanda ke taimakawa wajen haihuwa.
Yayin da namiji yake ƙara shekaru, prostate na iya ƙara girma, lamarin da kan haifar da matsalolin yin fitsari. Sai dai, girman prostate ba lallai yana nufin mutum yana da cutar kansa ba.
A cewar Moustapha Mainassara, mai gabatar da shirin kiwon lafiya , “Yana da muhimmanci maza su fahimci aikin prostate da cututtukan da ka iya shafarta. Sanin alamomin da ke nuna matsala zai taimaka wajen neman magani da wuri da kuma kare lafiya.”
Haka kuma, cutar kansar prostate na iya kasancewa ba tare da wata alama a farkonta ba. Wannan ne ya sa wayar da kan jama’a da tuntubar ma’aikatan lafiya suke da matuƙar muhimmanci.
Binciken lafiya da zuwa asibiti da wuri :
Cutar kansar prostate na daga cikin cututtukan kansa da suka fi shafar maza. Haɗarin kamuwa da ita yana ƙaruwa yayin da mutum yake tsufa. Haka kuma, idan mahaifi ko ɗan’uwa ya taɓa kamuwa da cutar, haɗarin na iya ƙaruwa.
Ana iya yin gwajin jini na PSA domin taimakawa wajen tantance matsalolin prostate. Likita ne zai tantance irin gwajin da ya dace, bisa la’akari da shekarun mutum, tarihin lafiyarsa da sauran abubuwan haɗari.
Moustapha Mainassara ya jaddada cewa: “Wasu maza suna jira sai sun fara jin alamomin rashin lafiya kafin su je asibiti. Amma wasu cututtukan prostate na iya ci gaba ba tare da alamomi ba. Saboda haka, yana da kyau maza su tattauna da ma’aikatan lafiya domin sanin ko ya dace su yi gwajin prostate.”
Daga cikin alamomin da ya kamata su sa mutum ya nemi shawarar likita akwai yawan yin fitsari, musamman da dare, wahalar fara fitsari, raunin kwararar fitsari, ko ganin jini a cikin fitsari ko maniyyi.
Idan mutum ya kasa yin fitsari kwata-kwata ba zato ba tsammani, ya kamata ya nemi agajin gaggawa.
Kariya da wayar da kan jama’a :
Baya ga zuwa asibiti, cin abinci mai gina jiki, motsa jiki akai-akai da guje wa shan taba suna taimakawa wajen kula da lafiyar jiki baki ɗaya. Duk da haka, babu wata hanya guda da za ta tabbatar da cewa mutum ba zai kamu da kansar prostate ba.
A ƙarshe, Moustapha Mainassara yana ƙarfafa maza su daina jin kunyar tattauna matsalolin lafiyarsu, su nemi shawarwarin ƙwararrun ma’aikatan lafiya, kuma su ɗauki matakan da suka dace domin kare kansu.

