
1. AL AJABIN SANYA ZOBUNAN AZURFA GA MAZA A MARADI.
A Maradi, sanya zoben azurfa ya zama ruwan dare a tsakanin maza. Wasu zoben ƙanana ne kuma ba su da wani ado na musamman, yayin da wasu kuma suke da girma, wani lokaci ana kawata su da ayoyin Alƙur’ani. A wurin masu sanya su, waɗannan kayan ado ba wai don kawata jiki kawai ake amfani da su ba. Wasu suna danganta su da wasu ƙarewar sihiri da kuma wasu ikon al’ajabi da ake ganin za su iya kare mutum daga mugun sa’a da sauran masifu.
Ider, wani ƙwararren mai sana’ar sarrafa azurfa a cibiyar sana’o’in hannu ta Maradi, cewa yayi.
« Tun da daɗewa, ana danganta azurfa da wasu siffofi na kariya, musamman daga mugayen ruhohi. A cewar wasu al’adu da akidu, wannan ƙarfe yana da alaƙa ta kut-da-kut da aljanu. Misali, wani lokaci ana iya ajiye zoben azurfa a wani wuri, sai ya ɓace ta hanyar da ba a fahimta ba, ba tare da sanin wanda ya ɗauke shi ba. A irin wannan yanayi, ana ganin cewa wani aljani da ba a iya gani ne ya kwashe zoben. »
Kowace safiya, masu sana’ar kayan ado na zinare da azurfa suna karɓar kwastomomi da ke zuwa a ƙera musu zoben azurfa ko kuma a tsaftace zoben da suke sanyawa.
Ibrahim, wanda yake ganin cewa bakinda zoben sa yake yi na iya zama alamar wata cuta da za ta iya kama shi ko kuma wasu matsaloli da za su iya fuskantarsa a nan gaba.
«Wannan zobe an yi shi ne da azurfa. Kuma ka sani, mutanen da suka san irin amfanin da wannan ƙarfe yake da shi, suna ba shi muhimmanci sosai. Ba a sanya zoben azurfa don ado kawai ba, har ma saboda alherai da amfanoni da ake dangantawa da shi. »
Sai dai sanya zoben azurfa ba ya rasa wasu ƙa’idoji da ake ganin ya kamata a kiyaye. Bisa ga wasu al’adun gargajiya da kuma imani, mutumin da yake sanya irin wannan zobe dole ne ya kasance yana kiyaye wasu ƙa’idojin ɗabi’a.
A cewar mai sana’ar sarrafa azurfa Ider, wasu halaye da ake ɗauka a matsayin munanan ɗabi’u ba su dace da sanya wannan ƙarfe da ake dangantawa da wasu kebantattun fa’idoji ba.
« Allah ne Ya ba azurfa darajarta da kuma fitar da ita daga cikin zurfafan ƙasa. Bisa ga al’adunmu da imaninmu, ana ganin cewa masu mallakar wannan ƙarfe suna samun ɗaukaka da albarkatu. Saboda haka, ya kamata a ba ta kulawa ta musamman. »
Ya kamata mutum ya san wurin da ya dace ya ajiye azurfa, wuraren da ya kamata ya riƙa sanya ta, da kuma yadda ya kamata ya riƙa sarrafa ta da amfani da ita. Saboda haka, kirana shi ne in yi kira ga kowa da kowa da ya fahimci muhimmancin azurfa, tare da yin amfani da ita ta hanyar da ta dace. »
Tsakanin al’ada, imani da kuma neman kariya, zoben azurfa na ci gaba da jan hankalin wasu mazauna birnin Maradi. Ko da yake babu wata hujja ta kimiyya da ta tabbatar da ikon al’ajabi da ake dangantawa da waɗannan zobba, baƙaƙen da azurfar take yi kuwa na iya faruwa ne sakamakon wasu sauye-sauyen sinadarai da ke faruwa tsakaninta da wasu abubuwa da ake samu a muhalli.
Sai dai ga waɗanda suka yi imani da waɗannan al’amura, zoben azurfa ya fi zama kayan ado kawai. Wani abu ne da suke jingina masa fatan samun lafiya, kariya daga haɗurra da masifu, har ma da makomar rayuwarsu.
Ahadi Moussa

